Maaskaas-“koek” met tamatie salsa

Dit is altyd lekker om ’n geheime resep te hê waarmee jy jou mense kan verras en hulle met nuwe oë na jou te laat kyk. En die lekkerte van hierdie resep is dat dit eintlik so eenvoudig en so maklik is! Koop net ’n lekker brood by ’n goeie bakkery of bak jou eie om daarmee saam te bedien.

Genoeg vir 4

Jy het nodig

Vir die maaskaas-“koek”

2½ koppies gladde maaskaas
2 teelepels vars gekapte roosmaryn
13 calamata olywe, ontpit en gekap
2 eetlepels gerasperde parmesaankaas
1 eier

Vir die tamatie salsa

2 ryprooi tamaties, geskil en gekap
½ rooiui, fyngekap
7 groot basiliekruidblare, fyn gesnipper
’n handvol platblaarpietersielie, fyngekap
1 teelepel balsamiese asyn
2 eetlepels eerste pers olyfolie
Sout en varsgemaalde swartpeper

Só maak mens

Klits die maaskaas in ’n groterige mengbak totdat dit gladder en meer hanteerbaar is. Voeg die roosmaryn, olywe, parmesaan en eier by en meng goed. Smeer ’n 20 cm losboom koekpan en voer met bakpapier. Plaas die koekpan op ’n bakplaat (jy wil nie die kaasmengsel in die oond laat drup nie). Skep die mengsel in die koekpan. Bak vir 35 – 40 minute in ’n voorverhitte oond van 180˚C of totdat dit ferm en ’n effense liggoud kleur het. Laat heeltemal afkoel.

Vir die salsa: Meng die gekapte tamaties in ’n mengbak saam met die ui, basiliekruid en platblaarpietersielie. Meng die asyn en olie in ’n klen bakkie en giet oor die tamatiemengsel. Plaas die “koek” op ’n koekbord en skep die salsa bo-op. Geur met sout en peper na smaak. Of jy kan die salsa eenkant in ’n bakkie bedien en afsonderlik op elk porsie skep. Sodoende sal die “koek” nie sopperig word as julle nie alles in een sitting kan opeet nie en dit vir later vir hou.