‘n Kiep wat jou asem wegslaan

Ek glimlag altyd wanneer ek sien hoeveel mense probeer pa-staan vir hierdie resep. Maar die waarheid is – dis so oud soos die kookkuns van Europa en het waarskynlik die tafels laat kreun nog lank voor Onse Jan met sy drie armsalige skuitjies hier in die skadu van die berg kom anker gooi het.

Poulet aux Quarante Gousses D’Ail (hoender met veertig knoffelhuisies) het sy ontstaan gehad in Provence waar knoffel beskou word as die arm man se truffel. Dis nou volgende die Scotto-suters in hul France The Beautiful Cookbook.

Moenie skrik vir die hoeveelheid knoffel nie. As dit “en chemise” (in sy hempie) gaargemaak word, word die knoffel sag en romerig en gee die ongelooflikste smaak aan hierdie hoendergereg.

Ek bedien dit gewoonlik net saam met brood om die sousies op te vee. Die paar keer wat ek dit al oor die Kersvakansie by die strandhuis gemaak het en ek niks anders as winkelbrood kon kry (ook nie die tyd gehad het om self te bak nie!), het ek vinnig plan gemaak. Meng net ‘n teelepel gedroogde gemengde kruie en ‘n bietjie knoffelsout met saggemaakte botter en smeer op ‘n paar snye witbrood, sny in driehoeke en druk vinnig onder ‘n voorverhitte oondrooster. Wees net gewaarsku – maak dit net voor opdiening anders storm die kinders (en die grootmense!) vir daardie kruiedriehoekies en dis op voor jou skottel die tafel gehaal het.

Die knoffelhoender is ‘n heerlike morsige skottel om te eet. Jy druk die knoffel uit hul skilletjies en eet soos ‘n smeer op die brood. Die res van die brood gebruik jy om die sousies op te vee.

Knoffelhoender

1 lekker groot heel hoender
Sout na smaak
2 takkies vars tiemie
2 takkies vars roosmaryn
2 takkies vars salie
2 selderystingels, met hul blare aan
2 takkies platblaar pietersielie
40 knoffeltoontjies, net so in hul skilletjies
3 eetlepels olyfolie
Varsgemaalde swartpeper

Besprinkel die hoender aan die binnekant en aan die buitekant met die sout. Plaas nou die helfte van die tiemie, roosmaryn, salie en seldery aan die binnekant van die hoender, ook die pietersielie en vier van die knoffeltoontjies. Rangskik die res van die kruie en die seldery in ‘n ovaal oondbak wat net-net groot genoeg is om die hoender te hou. Voeg die olyfolie, sout en peper en die res van die knoffeltoontjies by. Rol die hoender in die bak totdat dit alkant met olie bedek is. Bedek en bak vir 1¾ uur in ‘n voorverhitte oond van 200˚C.. Haal die hoender uit en plaas op ‘n plat opdienskottel. Rangskik die knoffeltoontjies rondom. Gooi die pansappe af in ‘n souspot en bedien saam met die hoender en die brood.

Vergeet van die kolonel. Hierdie is liplek-lekker! Sorg net dat daar genoeg jammerlappies op die tafel is.