Om die rollie self te swaai
Ek was jare lank ’n blaar uitgelewer aan die wind – nie ’n gedartel op ’n ligte briesie nie, maar ’n dolle waansindans in die verskriklike suidoos Totdat ek op ’n mooi dag besluit het ek het lank genoeg slagoffer gespeel…
Dit laat my met ’n glimlag terugdink aan kleintyd toe ek en my broer saam met ons maats cowboys en kroeks op die Karookoppie in ons agterplaas gespeel het. Lekker tye, ja, maar ek moes altyd die meisie wees wat in die bank gewerk het en òf oor die kop geslaan òf ontvoer is deur ’n skarminkel van ’n bakrower.
Totdat ek op ’n dag my voet neergesit en gesê het: “Aikôna! Ek wil ook ’n rollie swaai en die rowers op hul jis gee.”
En dis nou presies wat ek met die lewe gedoen het… ek het gekies om nie langer oor die kop geslaan te word nie maar self die rollie te swaai.
Hierdie Jack Daniels-koek is vir mense wat omdraai en die lewe terugbliksem. Dis nogal ’n groot koek – jy kan maklik sestien mense daarmee voer. Dit was ’n vreeslike gespot onder die werksmense toe ek dit die eerste keer kantoor toe geneem het en die koek staan nou amptelik bekend as Karen’s PC Hip Flask. Nie dat ek sê jy het ’n heupflessie nodig om die lewe aan te vat nie – dis net een van daai koeke wat tong uitsteek vir die lewe.
Want Jack is beslis nie ’n skaam outjie nie en met dié koek weet jy beslis hy is daar! Maar dis ’n ongelooflike smaak en die een bestanddeel vul die ander aan. Jack Daniels is ’n bourbon-tipe whiskey en is beter geskik vir bak as gewone whiskey. Dis bietjie duur, maar vir spesiale geleenthede kan jy maar so ’n bietjie oë toeknyp.
