Kerrie en frangipani met die Nuwejaar
My Nuwejaarsreis het begin met ‘n eksotiese kombinasie van kerrie en frangipani. Die kerrie was nie outentiek Indies nie, maar die frangipani so reg uit die tempels van Indië en Sri Lanka.
Dit was op hierdie dag, die eerste van die nuwe jaar dat my frangipani wat ek laasjaar geplant het, sy eerste blom gewys het –‘n diep, byna perspienk.
Dis net die wittes wat daar in die Verre Ooste tradisioneel troublom is. Die rooies bring ongeluk in die huwelik in. So dis beslis nie ‘n teken van wat vir my dié jaar wag nie. In elk geval – ná drie mislukte probeerslae, het ek gesweer – nooit weer nie!
Maar vir die kerrie sien ek ‘n ewigheid kans. Dis die een verhouding wat baie goed werk. En moenie my kom vertel kerrie hoort by winter en kaggelvuur nie. Gaan praat ‘n bietjie met die mense van Indië en Sri Lanka (ook ons eie Durban) waar kerrie net so deel is van die lewe daar soos die bedompige hitte.
Dis juis in Sri Lanka, baie jare gelede, waar ek in die skadu van ‘n speserywoud leer kerrie kook het. En teen dié tyd het ek al my resep vir my eie tuisgemaakte kerriepoeier vervolmaak.
Op hierdie Nuwejaarsdag kook ek kerrie, het ek besluit. En die spyskaart is ‘n fyn balans van smaak – my tuisgemaakte suurlemoenstroop met baie ys en ‘n paar takkies mint, my kerriepot op spierwit basmatirys en yskoue lietsjies vir nagereg.
Die kerrie het ek laag op laag gebou – ‘n beesvleiskerrie met die soet van wortel en kleurryke ondertone geskep met rooi soetrissie, stingelui en vars koljander. Dan die mineurklanke met Marsala en vrolike klawerdanse met ‘n goeie skeut witwyn.
Bees-wortel-en-soetrissiekerrie
Genoeg vir 4 – 6
3 eetlepels olyfolie
3 middelslag uie, fyngekap
3 knoffeltoontjies, gekneus en fyngekap
1 x 3 cm knoets vars gemmer, fyngekap of gerasper
1 rooi brandrissie, fyngekap
1,5 kg stowebeesvleis
sout en varsgemaalde swartpeper na smaak
¼ koppie Marsala
1 eetlepel matige kerriepoeier (verkieslik tuisgemaak)
gerasperde skil en sap van 1 suurlemoen
gerasperde skil en sap van 1 lemoen
7 middelslag wortels, geskraap en in muntstukke gesny
2 middelslag rooi soetrissies, wit gedeeltes en sade verwyder en in in repe gesny
4 stingeluie. fyngekap
‘n handvol gekapte vars gekapte koljanderblare
½ koppie droë witwyn
Verhit die olie in ‘n swaarboomkastrol en braai die uie daarin tot sag en deurskynend. Voeg die knoffel, rissie en gemmer by en braai saam. Voeg die vleis by en braai saam met die geurige uiemengsel totdat die vleis sy eie “bruinsous”begin vorm. Geur met sout en varsgemaalde swartpeper na smaak. Voeg die marsala en keriepoeier by, die gerasperde lemoen- en suurlemoenskil en die wortels, soetrissier en stingelui. Roer die koljanderblare en wyn goed deur. Bedek die pot, verlaag die hitte en laat vir twee uur lank op die laagste hitte prut. Haal die deksel tydens die laaste halfuur kooktyd af sodat die vloeistof effens kan wegkook en die sous verdik. Bedien met ‘n geurige wit basmatirys.
