Onvergeetlike kerrie
Ek het grootgeword met winkelkerriepoeier.
Dis wat ek as kind leer ken het in die kerriepot wat my ma vir ons op koue wintersdae gemaak het. In die bobotie en kerriefrikkadelle op my ouma se lang, wit gedekte tafel.
Ek kon dit ook proe in die groot blink potte met rys en basaarkerrie op Volmoed in die klein kerksaaltjie op die bult. Ek sien nog hoe die tannies in hul voorskote met groot lepels gereed staan en wag dat die dominee moet amen sê sodat hulle kan begin skep.
In die ou dae, toe die Oriental Plaza nog aan die oorkant van die Goeie Hoop-sentrum met een van die beste Indiese restaurante gespog het, was dit groot bederf om daar te gaan kerrie eet. Vuurwarm kerries wat jou maskara in sweetpoeletjies onder jou oë laat opdam het. Glad nie winkelkerrie nie – eksotiese smake van ver af.
Maar dis eers in die speserywoude van Sri Lanka waar ek regtig besef het waaroor dit gaan. Dis waar ek eintlik leer kerrie kook het.
Die geheim is om jou geure laag op laag by te kook. Maar jy raak nie aan jou potte voordat jy nie eers jou eie kerriepoeier gemeng en gemaal het nie. Ek het altyd ‘n pot van my toorkerriepoeier in my koskas. En so af en toe eksperimenteer ek met ander mengsels.
Soos hierdie Kreoolse nommertjie.
Dis ‘n ingewikkelde storie – jy maak drie verskillende speserymengsels aan voordat jy kan begin. Marinademengsel, dan jou Wes-Indies-Kolombiaanse kerriepoeier en moenie van die quatre épices vergeet nie. Maar die ongelooflik, fynverweefde geurbalans, maak alles die moeite werd. Hierdie kerrie kook jy net vir baie, baie spesiale mense.
Vir die marinade
2 uie, gekap
2 knoffeltoontjies, fyngekap
1 eetlepel fyn komyn
sout en varsgemaalde swartpeper na smaak
4 eetlepels sonneblomolie
4 eetlepels witwynasyn8 – 10 hoenderstukke
6 eetlepels sonneblomolie
sout en varsgemaalde swartpeper na smaak
2 takkies tiemie, fyngekap
‘n handvol gekapte vars pietersielie
3 uie, grofweg gekap
4 knoffeltoontjies, fyngekap
2 eiervrugte, in stukkies gekap
1 rooi soetrissie, wit gedeeltes en sade verwyder en in stukke gekap
1 geel soetrissie, wit gedeeltes en sade verwyder en in stukke gekap
2 groen soetrissies, wit gedeeltes en sade verwyder en in stukke gekap
3 – 5 groterige murgpampoentjies, in stukke gekap
4 lourierblare
1 rooi brandrissie, fyngekap2 koppies hoenderaftreksel
Vir die Wes-Indies-Kolombiaanse kerriepoeier
(jy gaan ½ koppie van die geroosterde, gemaalde poeier nodig hê – die res kan jy in ‘n lugdigte flessie bêre)
4 eetlepels rou witrys
1 teelepel naeltjies
1 eetlepels swart mosterdsaadjies
1 eetlepel swartpeperkorrels
4 eetlepels komyn
4 eetlepels koljander
4 eetlepels borrieVir die quatre épices
(jy gaan net 1 teelepel hiervan nodig hê – die res kan jy in ‘n lugdigte flessie bêre)
2 eetlepels witpeperkorrels
1 eetlepel fyn gemmer
1 eetlepel naeltjies
1 eetlepels vas gerasperde neutmuskaat
Sap van 2 lemmetjies, opsioneel
Meng al die bestanddele vir die marinade en plaas saam met die hoenderstukke in ‘n glasbak. Meng goed sondat die stukke alkant met die marinade bedek is. Bedek die bak met kleefplastiek en laat 2 – 3 uur staan. Verhit die 6 eetlepels olie in ‘n swaarboomkastrol en braai die hoenderstukke daarin sonder om dit te erg te verbruin. Geur met sout en peper na smaak. Voeg die groente, kruie en aftreksel by. Maak die kerriepoeier: Verhit ‘n pan en rooster al die bestanddele, behalwe die borrie, saam vir ‘n paar minute totdat die saadjies begin skiet en die geur vrygestel word. Roer die borrie by en maal met ‘n speserymeul of stamper en vysel. Voeg ‘n halwe koppie van die mengsel by die res van die bestanddele in die pot en roer goed deur. Maak die quatre épices: Meng al die bestanddele saam en maal met ‘n speserymeul of stamper en vysel. Voeg ‘n teelepel van die mengsel by die kerriepot en bêre die res. Bedek die pot, verlaag die hitte en laat vir 40 minute prut. Roer die lemmetjiesap by, indien verkies, en bedien met lekker witrys.
En as ek dalk ‘n goeie wenk kan gee – maak soos ek reg aan die begin gesê het en maal jou kerriepoeier en reg aan die begin, nog voor jy jou marinade aanmaak.
